‘‘ตสฺส ธมฺเมสุ ทายาโท, โอรโส ธมฺมนิมฺมิโต;
สพฺพาสเว ปริญฺญาย, นิพฺพายิสฺสตินาสโวฯ
[82]
‘‘เทวโลเก มนุสฺเส วา, นิพฺพตฺติสฺสติ ปุญฺญวา;
เทวยานปฏิภาคํ, ยานํ ปฏิลภิสฺสติฯ
[83]
‘‘ปาสาทา สิวิกา วยฺหํ, หตฺถิโน สมลงฺกตา;
รถา วาชญฺญสํยุตฺตา, สทา ปาตุภวนฺติ เมฯ
[84]
‘‘อคารา นิกฺขมนฺโตปิ, รเถน นิกฺขมิํ อหํ;
เกเสสุ ฉิชฺชมาเนสุ, อรหตฺตมปาปุณิํฯ
[85]
‘‘ลาภา มยฺหํ สุลทฺธํ เม, วาณิชฺชํ สุปฺปโยชิตํ;
ทตฺวาน ปานธิํ เอกํ, ปตฺโตมฺหิ อจลํ ปทํฯ
[86]
‘‘อปริเมยฺเย อิโต กปฺเป, ยํ ปานธิมทาสหํ;
ทุคฺคติํ นาภิชานามิ, ปานธิสฺส อิทํ ผลํฯ
[87]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[88]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[89]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปานธิทายโก เถโร อิมา คาถาโย
อภาสิตฺถาติฯ
ปานธิทายกตฺเถรสฺสาปทานํ นวมํฯ
10. ปุลินจงฺกมิยตฺเถรอปทานํ
[90]
‘‘มิคลุทฺโท ปุเร อาสิํ, อรญฺเญ กานเน อหํ;
วาตมิคํ คเวสนฺโต, จงฺกมํ อทฺทสํ อหํฯ
[91]
‘‘อุจฺฉงฺเคน ปุลินํ [ปุฬินํ (สี. สฺยา. ปี. ก.)] คยฺห, จงฺกเม โอกิริํ อหํ;
ปสนฺนจิตฺโต สุมโน, สุคตสฺส สิรีมโตฯ
[92]
‘‘เอกติํเส อิโต กปฺเป, ปุลินํ โอกิริํ อหํ;
ทุคฺคติํ นาภิชานามิ, ปุลินสฺส อิทํ ผลํฯ
[93]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[94]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[95]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุลินจงฺกมิโย เถโร อิมา คาถาโย
อภาสิตฺถาติฯ
ปุลินจงฺกมิยตฺเถรสฺสาปทานํ ทสมํฯ
นฬมาลิวคฺโค อฏฺฐจตฺตาลีสโมฯ
ตสฺสุทฺทานํ –
นฬมาลี มณิทโท, อุกฺกาสติกพีชนี;
กุมฺมาโส จ กุสฏฺโฐ จ, คิริปุนฺนาคิโยปิ จฯ
วลฺลิกาโร ปานธิโท, อโถ ปุลินจงฺกโม;
คาถาโย ปญฺจนวุติ, คณิตาโย วิภาวิภิฯ
49. ปํสุกูลวคฺโค